انا هحلق شعري كله بالمــــــــــــوس ....!!هام جدا لجميع العضوات

مش انا اللي هحلق
بس ده الموضوع اللي عاوزين نتناقش فيه مع بعض
لانه زاد اوي عن حده
طبعا احنا في فتكات الحمد لله اكبر منتدي نسائي علي الاطلاق
وكلنا عايشين اسره واحده بنحب نساعد بعض
علشان كده النقطه دي ممكن تستغل من ناس كتير اوي
ندخل فالموضوع
دلوقتي كل كم يوم
تلاقي فتوكه وجديده ياريت تركزو علي نقطه جديده دي اوي
تقول الاتي
انا نويت احلق شعري قرعه
انا خلاص هحلق شعري كله بالموس
المهم بما اننا بنحب نساعد بعض
تلاقي كل الفتوكات دخلو الموضوع
وانا اولهم علي فكره
الكل يفضل يقولها ليه بس يا حبيبتي
طيب جربي تعتني بيه
اهتمي بيه
طيب روحي لدكتور
طيب عالاقل قصيه كاريه مثلا
وكم هائل من الأراء علشان نساعد الفتوكه دي
نيجي بئه لردها
لالالا
انا نويت خلاص
انا خلاص عملت كل ده ومفيش فايده
طيب اول نقطه بما انك نويتي خلاص
لزمته ايه الموضوع
لو كنتي عملاه علشان تراجعي نفسك
كنتي لما شوفتي كل الردود بتقولك بلاش
كنتي تراجعتي
لاكن ابدا تلاقيها متمسكه انها برضه هتحلق
نقطه تانيه
تلاقي بنات يقولو حرام يا حبيبتي ده تشبه بالرجال
تلاقيها تقولك لالا انا سئلت شيخ وقالي احلقيه
يعني مصممه من كل الجهات وعندها رد علي كل رد
رد تاني طيب روحي لدكتور
تقولك روحت مفيش فايده
طيب استخدمي كذا
لا استخدمت خلاص هحلق
طيب خلاص يا قمر براحتك بقي احلقي
بس في تحذير لعضوات فتكات طيبات القلب واللي بيساعدو فعلا من قلبهم

ياريت تاخدي بالك ان الامر كده مش طبيعي
وعلشان منظلمش حد
لو حابه تساعدي قوليلها رئيك
بس متتعبيش نفسك انك تقنعيها
لان في ناس بتكون ايمو يا جماعه
الايمو حاجه زي عبده الشيطان كده ربنا يحمينا من الفتن وقله الايمان دي
دول بيحاولو يغيرو فكرك بطريق غير مباشر
يعني اقنعك انك تعملي كده في شعرك
احاول ازين ليكي فكرتي
وليهم برضه طريقه لبس معينه وقصات شعر معينه وميك اب معين
كل ده بيوصلو ليكي بطريق غير مباشر
وانتي كل همك تنصحيها وانتي مش واخده بالك ان هي اللي عاوزه
تزرع فيكي ظاهره منهم

ولو راجعتي قوانين قسم الشعر
هتلاقي النقطه دي
ممنوع كتابه المواضيع التي تحث و تشجع حلق الشعر
عن ابي عباس رضي الله عنه قال :{ لعن رسول الله (صلى الله عليه وسلم) المتشبهين من الرجال بالنساء والمتشبهات من النساء بالرجال}
بستثناء الحالات المرضيه المضطره الي ذلك *شفاهم الله وعفاهم*
ومع ذلك في مواضيع غريبه بتنـزل
ومنقدرش نمنعها لان فعلا في حالات مرضيه
شعرهم كله بيتساقط شفاهم الله
وبيكونو فعلا محتاجين حل
وعموما احنا مش هنئيدك ونقولك ردي او مترديش
براحتك ردي
بس احذري
هنخلي نيتنا حسنه انها مش قصدها تشجعنا علي كده
بس لما تلاقي الموضوع صاحبته مصممه علي رئيها
والموضوع اتحول من استشاره
الي اقناعك بفكره
ابتدي وقفي رد وافهمي انتي بئه هي قصدها ايه
لان المواضيع اللي نزلت الفتره الاخيره غريبه بطريقه واضحه وصريحه
وخصوصا تلاقي واحده جايبه فيديو من يوتيوب
بنات اجانب شعرهم لحد اخر الضهر واطول
وبيحلقوه كله بالمكنه
وتقولك ايه رئيك تيجي نجرب ؟؟
عذرا سيتم غلق هذه المواضيع
لو اللي منزله الموضوع حابه تجرب تجرب هي لوحدها
احنا مش بنجرب شيء رسولنا الكريم نهانا عنه
وبالنسبه لمواضيع انا هحلق شعري بالموس
هينـزل البنات هيقولو رئيهم وهيغلق الموضوع بعد وضع الاراء
وعذار صاحبته ممنوع تنـزله تاني
مسموح فقط بالمواضيع اللي صحبتها مريضه فعلا
دي علي عنينا كلنا نقف جنبها ونساعدها
نقطه تانيه خارج الموضوع ياريت لو لقيتي اي موضوع
بيقولك وصفه رهيبه اضغطي حملي من هنا
ياريت متحمليش علشان غالبا بيكون فيروس
اللي عنده وصفه مش محتاج يحطها في ملف تحميل هيكتبها اسهل
وتبلغيني او تبلغي اي مشرفه اونلاين علشان تتصرف
اسئل الله ان يحمينا من الفتن
ويبعد عنا كل من ارادنا بسوء