لفيت قسم الشعر كله وجبتلك الخلاصة .. مش هتخشي قسم الشعر تاني بعد ما تقري موضوعي

النهاردة جايبالكم معايا موضوع ضرب نار وهيعجبكوا جدا ان شاء الله

قبل ما ابدأ في اي حاجة هقولكم مواصفات شعري

ناعم نسبياً .. قاطع رقم قياسي في الهيشان .. جاف .. مقصف .. قصير تحت كتفي بحبة بسيطة .. باهت ومطفي كدة .. فيه قشرة طبعا .. تقيل


اوكي

دلوقتي بقى هقولوكوا تقسيمة الموضوع
الاول هقول شوية نصايح وبعد كده هقولكم الادوات وبعدين هقول طريقة استخدام كل حاجة بالتفصيل ونتيجتها كانت ايه على شعري
بس لو سمحتم من الاول كده عايزين نلتزم لأن الموضوع تقيل وصعب حبتين وعايز ارادة وياريت قبل ما نبدأ في اي حاجة يكون معانا ادواتنا كلها عشان نقرا الموضوع بقلب جامد

اولاً .. النصايح :
شعرك لازم تخليه يتنفس لأنه زيك بالظبط بيحس فياريت تفرديه بدون اي توك خالص فيه لمدة ساعة او نصف يومياً
اياكي ثم اياكي تخلصي الشاور بتاعك وتروحي عاصرة شعرك وتلميه وهو مبلول كده .. قمة الغلط
لما تخلصي الشاور بتاعك هاتي مشط بلاستيك واسع وسرحي شعرك براااحة جدااا عشان الميه اللي فيه تتصفى بسهولة وحطي فوطة على ظهرك وسيبيه فوقيها ينشف لوحده بدون اي تدخل منك
ابعدي خالص عن السيشوار والمكواة وحنة الفرد بالاعشاب والصبغة وكل ده خالص
سرحي شعرك بمشط خشب وهو ناشف يومياً
ابعدي قدر الامكان عن الشمس
البسي طرحة او طرحتين بالكتير وتكون قماشة كويسة لشعرك مش اي كلام .. ومتكتريش عن طرحتين
ابعدي عن المياه السخنة اثناء الاستحمام وياريت تاخدي الدش بتاعك عادي من غير ما تغسلي شعرك وبعد ما تخلصي حطي راسك تحت حنفية الحوض عشان المية الساقعة او الفاترة انتي مش هتستحمليها تنزل على جسمك اثناء غسل شعرك
متحطيش اي زيت او كريم او خلطة على شعرك وهو مبلول اوي او وسخ لأن المياه او الوساخة هتبقى عاملة زي الطبقة العازلة ما بين الماسك وما بين شعرك
متثبتيش على تسريحة واحدة وغيري فيهم عشان شعرك مش يتنحل ومتشديهوش اوي لورا
قبل ما تجربي اي وصفة لازم تتأكدي انها هتناسب نوع شعرك وانها متجربة قبل كده
اشربي ميه كتير واهتمي بأكلك
قصي 1سم او 1.5 من شعرك كل شهرين هجريين عند اكتمال القمر يعني في يوم 13 او 14 من الشهر عشان التقصيف ويايرت تقرولي الموضوع ده
http://forums.fatakat.com/thread1179145
متلفيش شعرك دوامة لمده اكتر من 6 ساعات عشان الشعر وهو مغير وضعه لمده طويلة ممكن يقع

ثانيا بقى الادوات :
بصي انصحك تكتبي الحاجات اللي تحت دي كلها في ورقة وتشطبي على كل حاجة فيها بعد ما تستخدميها لأن في حاجات ليها استخدامين
بصي يا ستي هتخطفي رجلك على العطار تجيبي الحاجات دي :
زيت خروع
زيت زيتون
زيت جرجير
زيت توم
زيت حلبة
زيت لوز مر
زيت خردل
زيت صبار
زيت سمسم
زيت جنين القمح
زيت جوز الهند (النارجيل)
زيت ذرة (بتاع الاكل)
زيت عباد الشمس(بتاع الاكل)
زيت الجوجوبا ( وده ممكن مش تلاقيه عند العطار)
الزيوت دي كلها انا جبتها على حسب طول شعري 30 مللي
نكمل ..
عشبة الآس
عشبة السدر
عشبة الروزماري
بذور حبة البركة
والاعشاب بقى ياريت يكونوا ورق مش مطحونين وبالنسبة للكمية انا جبت نص تمن ( يعني التمن كده انا جبت نصه)
ومتخافيش هيغرقوكي

كده خلصنا العطار

نخطف رجلنا على الجزار وتقوليله عايزة نخاع هيقولك كام ماسورة قوليله اتنين وخليه يطلعلك النخاع اللي جواهم عشان هيغلبوكي على ما تطلعيهم انتي

بعدين اخطفي رجلك على اي مشتل وهاتي صباراية حلوة كده

بعدين اخطفي رجلك على مطبخك وجهزي الحاجات دي
معلقتين كبار زبدة او سمنة
5 معالق كبار عسل ابيض
5 معالق كبار عسل اسود
4 موزات
2 كوب لبن او 3 اكواب زبادي
6 معالق مايونيز
3 معالق بن كبيرة
صفار بيضتين
3 او 4 ثمرات كيوي
نصف ربطة جرجير
بصلة متوسطة
6 فصوص توم متوسطة
4 ثمرات فلفل
بعدين اخطفي رجلك على الصيدلية وهاتي فازلين

بعدين اخطفي رجلك على محل 2.5 وهاتي بخاخين كل واحد فيهم ييجي لتر كده

$$$$$$$$$$$$$$$$$$$$$$$$$$$$$$$$$$$$$$$$$$$$

كده خلصنا الادوات
ندخل بقى على اللي بعده


بصي يا ستي

الزيوت اللي احنا جيبناها دي هتفرغيها كلها في بخاخ من اللي جبناهم واركنيها على جنب دلوقتي

نيجي للاعشاب
بالنسبة للسدر خدي منه مقدار قبضة يد كده وصبي فوقيها لتر ميه مغلي وسيبيه ينقع ليلة وبعدين صفيه وخدي الميه وسيبيه على جنب دلوقتي
بالنسبة للآس خدي منه معلقتين شاي واغليها في كوب ونصف ماء وسيبيه برضه ينقع ليلة وبعدين صفيه وخدي الميه واركنيه على جنب
بالنسبة للروزماري خدي منها معلقة شاي واغليها في كوب ماء وبرضه نفس العملية سيبيه ينقع وبعدين صفيه وخدي مايته
اما بقى حبة البركة فنفس طريقة الروزماري

خلاص حضرنا مغلي الاعشاب
هتاخديهم بقى كلهم ما عدا السدر وتحطيهم على بعض في البخاخ التاني اللي جبناه
وبعدين تاخدي كوب ونصف بس من لتر مغلي السدر وتحطيه على باقي الاعشاب في البخاخ وباقي اللتر خزنيه عندك في التلاجة

بعدين هتاخدي ثمرة فلفل من اللي حضرناهم على البصلة علىخمس فصوص التومعلى نصف ربطة الجرجيروتحطيهم في حلة وعليهم كوب ونصف ماء واغليهم وبعدين صفيهم وخدي المية دي وحطيها على بقية مغلي الاعشاب في البخاخ

وبعدين هتاخدي 3 ثمرات الفلفل اللي باقية وقطعيها وانقعيها في الاعشاب دي لمدة كام يوم كده وبعد كده صفيهم بحيث البخاخ ده يبقى عبارة عن مية الاعشاب وبس

اركني بقى البخاخ ده على جنب


هاتي بقى النخاع من الجزار هتلاقي فيه حتت حمرا كده شيليها لأنها دم متجمد
وحطي على النخاع 3 معالق شاي من الفازلين وسيحيهم مع بعض على حمام ماء
هتلاقي مهما تسيحي فيهم هتلاقي حتت دهن كده مش راضية تسيح
متحاوليش تسيحيها وارمي الحتت دي وخدي النخاع والفازلين وحطي عليهم 3 معالق كده من كوكتيل الزيوت اللي جهزناه في علبة كريم فاضية عشان يضيع ريحة النخاع واركني العلبة دلوقتي على جنب

هاتي بقى الصباراية اللي جبتيها من المشتل والبسي جوانتي وافتحيها وطلعي الجل الشفاف اللي جواها ولو لقيتيه احمر يبقى بايظ وارميه
واركني الجل دلوقتي على جنب

الحاجات بقى اللي جهزتيها في مطبخك
هاتيها كلها ما عدا البصلة وفصوص التوم وربطة الجرجير لأننا استعملناهم وغلينهاهم خلاص
هاتيها كلها وعليهم جل الصبار اللي ركنتيه واضربيهم في الخلاط كويس اوي وحطيهم في علبة بس طبعا تكون كبيرة عشان تكفي

$$$$$$$$$$$$$$$$$$$$$$$$$$$$$$$$$$$$$$$$$

كده خلاويص جهزنا كل حاجة
نيجي بقى لطريقة الاستخدام

* بخاخ مغلي الاعشاب اللي جهزناه ده هترشي منه يوميا على فروة راسك بسسسسسسس .. اياك تيجي ناحية شعرك نفسه
وعلى فكرة الاعشاب دي تحفة تحفة .. طولت شعري والقشرة خلاص بح لأن السدر مطهر حلو اوي وكمان خلته صحي كده وتقل زيادة عن الاول وبدأ يسود صراحة لأن الروزماري بيسود ومتخافوش من ريحة التوم والبصل لأنها مش هتبان

*الماسك اللي ضربتيه في الخلاط ده بقى هيتعمل اسبوعيا قبل كل شاور ليكي وهتسيبيه على شعرك لمده 4 ساعات وعلى فكرة انا عملته بكميات كبيرة عشان يقعد معاكي فترة وقبل كل حمام تاخدي منه شوية على ادك وترجعيه تاني في الفريزر عشان مش يبوظ
ونتيجة الماسك ده على شعري كان جميل جدا .. نعمه وخلاه طري اوي وبقى فيه لمعة حلوة جدا والهيشان خف شوية
بس عايز مداومة على الاستعمال .. يعني نتيجته بتبان مثلا بعد مرتين كده

*النخاع والفازلين اللي في علبة الكريم الفاضية بقى هتستعمليهم ككريم يومي ليكي زي الاعشاب كده
يعني انا استغنيت تماما عن كريم التصفيف والزيت وبقيت بحط منه على طول على فروة راسي وعلى شعري
وبجد بقى ده تحفة تحفة تحفة .. شعري نعم بطريقة وهم والهيشان اختفى تماما من قاموسي وشعري بدأ يطول من النخاع وبقى طري جداً
يعني حتى ساعات بكسل اعمل الماسك الاسبوعي او احط الاعشاب لكن ده اللي مش بستغنى عنه بجد فظيع
لما احط منه والف شعري دوامة لما افكه اقسم بالله بيبقى كأنه مكوي وربنا يحاسبني على الحلفان ده
وبقيت بسيب شعري بعد ما كنت على طول لماه بسبب الهيشان ده غير بقى اللمعة اللي فيه

*البخاخ بقى اللي فيه الزيوت ده يا ستي كل وظيفته في الدنيا انك تحطي منه ييجي 3 معالق كبار كده على الماسك الاسبوعي اللي هتطيه وتقلبي وتحطي على شعرك واياكي تحطي الزيت على شعرك للاستخدام اليومي لأن الزيوت تقيلة جدا ولزجة وهتوقع شعرك .. لو انتي بتستحمي مرتين اسبوعيا يبقى ممكن تستخدميها كحمام زيت في مرة قبل الحمام وتسيبيها 3 ساعات والمرة التانية تستخدمي الماسك التاني لوحده ياإما تريحي دماغك وتخلطيهم على بعض وتحطيهم كماسك واحد ..
.. والنتيجة بقى الزيوت دي كل فيهم ليه وظيفته يعني واحد بيطول والتاني يتقل والتاني ينعم .. كده يعني .. يعني فيها كل الكنوز


$$$$$$$$$$$$$$$$$$$$$$$$$$$$$$$$$$$$$$$

كده يا فتوكات انا خلصت وعلى فكرة كل الحاجات دي متجربة مني شخصياً
وعارفة ان الكورس صعب بس انا طماعة ومرضتش اسيب حاجة الا لما جربتها عشان زيادة الخير خيرين
وكمان مرضتش اكتب اي حاجة الا لما اجربها واستنيت عليها لما تبان نتيجتها ايه

على فكرة مبقتش بجيب اي حمامات كريم جاهزة او بلسم او سيروم او اي حاجة
هو ده كل اللي بستعمله وبعتمد عليه
وبجد شعري اتقلب 180 درجة
مبقاش اللي كنت اعرفه زمان
بقى جميل جدا والله
واي حاجة في الدنيا بتيجي بالاهتمام


طبعا انا سمعت عن القطونة وعن الترمس الحلو للشعر
بس مجربتش الترمس وكمان القطونة انا لسه عايزة اداوم عليها شوية علشان اقول النتيجة وانا مطمنة وضميري مستريح

وبالنسبة للاملج انا مش نسياه
بس برضه مجربتوش غير مرة وبصراحة شكله مش نفع معايا يعني لا نفع ولا ضر

بالنسبة بقى للزيوت الجاهزة اللي ليها شهرة زي الحشيش والحية وجدايل والبراري وكل ده
انا مجربتش بصراحة لأن الميزانية لا تسمح وكمان انا شايفة اني اكتفي بهذا القدر

في ناس سمعتهم بيسألوا عن تونيك الفازلين انا ان شاء الله ناوية اجربه واقولوكم على النتيجة

انتظروا مني الجزء التاني
وده بقى هيتكلم عن تجربتي مع الترمس والقطونة والاملج وتونيك الفازلين
بس مرضتش اكتب عنهم الا لما اجرب واتأكد بنفسي

على فكرة
احب اشكر ناس كتير اوي ساعدتني بطريقة غير مباشرة عشان اطلعلكم الموضوع ده
وخايفة اقول عليهم لأنسى حد وتزعل فتوكة قمراية مني
انا ليا مواضيع كتير في قسم استشارات خاصة بالشعر
احب اشكر كل واحدة ردت عليا في اي موضوع ليا بستفسر فيه عن حاجة
واحب اشكر كل فتوكة بعتلها رسالة خاصة اسألها فيها عن حاجة وردت عليا ومكسفتنيش

ويارب الموضوع يكون فادكوا
ومتنسوش التقييم لو عجبكم